Ameɣnas deg imezwura (III)

Iẓuran:- Amek ken-d-ttwalin iɣmisen d lmidyaten di lawan nni?

Sliman:- Nqeddec berra-nsen, iɣmisen neɣ ikabaren n tsertit ur d-cqan ara akk deg-neɣ, ɣas ula d akabar PCF i ysedduy G.Marchais degimir-nni. Maca, akabar PRS ak d wayen id-igran deg FFS, usan-d mgal nneɣ.

Iẓuran:- Amek llan inuẓar iqvayliyen imiren nni ar Wegraw Imaziɣen ?

Sliman:- Ur zgiɣ ara dinna deg Wegraw, maɛna ḥsiɣ belli yiwen am Farid Aɛli yezga ittas-d. At Aɛli Sliman Ǧaɛfer, Sliman Azem walaɣt tikelt. Taleb Rabeḥ, xas yugi ad yecnu, maca ur d-yuɣal ara d axsim. Ferḥat Mhenni daɣen yusa-d. Cix n Lḥesnawi yusa-d tikelt yernu yefka-yaɣ-id dduɛa n lxiṛ. Akli Yeḥyaten dima yezga icennu i lamikal n FLN (A.A.E). Dayem yettruẓu-d deg-neɣ, yeqqar-aɣ: “kunwi d imakaren, d ixeddaɛen”. Uɣalen d iɛdawen n temsalt-nsen, imi nessutur-asen mraw frank i tkerḍa n uttekki tikelt iwseggas. Akli Yeḥyaten, yessaweḍ armi d-yergem ula d Muḥend Aɛrav ar Wegraw di tilifu. Ur yeḥsa ara s tin n tmara i nettxellis lekra n wexxam-nni deg nedduri u d Ḥanuz Md Saɛid iɣ-t ittxellisen. Wid id-yettarran mara nesseqsi fell-asen ar tmeɣriwin, illa : Farid Aɛli, Sliman Azem, At Ali Sliman Ǧaɛfer (winna icennun :taḍeggalt-iw tamaɛzuzt…)

Iẓuran:- Deg udlis-is aneggaru, Muḥend Aɛrav yenna belli Sliman Azem iceṛṛeḍ lkaci meqqeren akken ad yekki deg lgala ?

Sliman:- Ur zmireɣ ara ak-d-rreɣ af useqsi agi, acku mačči d nekk i yeskellefen af usefrek* n tneẓraft* n Wegraw. Af akken tesneɣ, Meḥend Aɛrav d argaz n tidett u d agraɣlan*. Ur yeskiddib ara, ma yenna-t-id, ad-yeḍḥu d tidett. Af ayen i yiɛnan nekk, yal tikelt ara d-mlileɣ Sliman Azem, ittaɣ felli lqidaṛ n warem* neɣ zayed n iɣmisen af tikelt u yettxellis-iyi-d d umatu akken aten yefreq i yemsaɣen n lqaha.

Iẓuran: -Vesɛud Muḥend Aɛrav af akken d-qqaren immezɣanen neɣ akk wid yuran fell-as, belli d anesḍabu u d azɣuzran. Kečč it-iqerben, d acu ara d-iniḍ af aya ?

Sliman:- Nek s yiman-iw af akken tesneɣ ur yella ara d argaz anesḍabu*. Dayem yezga yeḥdeq. Di laɛmeṛ it-walaɣ yerfa neɣ yesaɛli taɣect-is ar medden. D aḍabu is-iseṭṭaɛen tabzimt* agi n uzɣuzran*, u Iqvayliyen tabaɛen, zreɛan tasmakta* tillifant*. Vesɛud d adifandi i yettedifandi af yiman-is, af ayla-s d wid akk am netta. Amek ma yiwen yenna netta d amaziɣ mačči d aɛrav d azɣuzran ? Muḥend Aarav ak-yeqqar nek mačči d aɛrav. Ayagi d azɣizer ? Muḥend Aɛrav d amdan n llehna d talwit , d yiwen ur nebɣa yara ad yenger.

Amawal :
Mraw :10,
warem 20,
tinezraf : finance,
asefrek : gestion,
agraɣlan:revolutionnaire,
anesḍabu:autoritaire,
azɣuzran:raciste,
tabzimt:etiquette,
tasmakta:ideologie,
tillifant:ambiante.

Soyez le premier à commenter

Laisser un commentaire