Inevgi amessas

Zik deg tegrest, adfel idell merra tiɣaltin d luḍa, ad as-tiniḍ d amaḍal* yelsan abernus amellal. Di tsemhuyt am ta i iruḥ umɣar d inebgi ɣur umeddakel-ines. Lxir yewwi yid-s d aḍellaɛ n lleft*. Deg ubrid i yuɣ, asemmiḍ igezzem, taxlult tetteddu deg anzaren-is. Akken kan i t-yefka wemnar n tewwurt n wexxam, isellem ɣef imawlan s ccuq*, iwelleh asen lleft nni, yeggermeḥ* ɣer tesga anda yella lkanun i wakken ad yeẓẓiẓen acku yenɣa-t uqerrif* ak d ɛeggu si tikli.

Yekka kra n wussan ttrajun-t imawlan n uxxam ad tfak terzeft-is, maca inebgi ur nezmir ara i usemmiḍ ur d-yecɣel ara s rrḥil, yufa iman-is dinna, berra n tewwurt yekkat wedfel s tidett-is.

Ruḥ tura kečč ad testixereḍ ɣef yiri n lkanun mi ara yeẓẓiẓin neɣ ddaw n tduli mi ara yeṭṭes. Bab n uxxam yessetḥa ad yessufeɣ ameddakel-is ɣas ma yeḥṣa iɛeddan cwiṭ i tilas acku inebgi n tegrest ẓẓay nezzeh. D tamɣart i iɣaḍ lḥal aṭṭas. Yal ass tekkat inebgi n twaɣit s lemɛani, teqqar :

Inebgi n yiwen wass d afessas
Inebgi n sin wussan d amessas
Inegbi n wussan aṭṭas
Ddem-d aɛekkaz tedduḍ fell-as

Inebgi yesla-d akk maca yerra iman-is d win yesmuɛezgen*, as-tiniḍ ur yelli ara maḍi din. Armi d yiwen wass nniḍen, tekker temɣart zik ad tenneḍ tiɣerɣert*, amɣar bu lleft mazal-it yeṭṭes deg tesga, dɣa tessemsed* taɣect-is, tendeh* akken ad as-d-isel :

Yuli wass tban tafat
Win yettẓallan tafejrit* yekker
Inebgi yetebɛ-it rrḥil
Ulayɣer ad yeckerker
Mi yas-d-yesla yinebgi nni yerra-as-d :
Yugi wul ad yennecraḥ
Mi nuɣal nessusem
Tagrist ḥesbi-tt am yiḍ
Tafsut ma irad ad nennser

Amɣar bu wudem azuran, yessɛedda tagrest armi i tfukk, akken i d-teffeɣ tefsut yekker ad iruḥ, rran as lleft deg uḍellaɛ-is… yetteddu iqqar i yiman-is : d lleft i d-wwiɣ, d lleft i ččiɣ, d lleft i d-rriɣ…

Amawal :
amaḍal : le monde
lleft : navet
yeggermeḥ : aller vers, précipitamment, sans-gêne
ccuq : grand manque, fougue,…
uqerrif : engourdir par le froid
yesmuɛezgen : faire le sourd
tiɣerɣert : le salon
tafejrit : tafrara, l’aube
tendeh ; hausser la voix
tessemsed : aiguiser, préparer a …

* Taneffust n Mas M. Houd. Teffeɣ-d deg uɣmis n usqamu unnig n timuzɣa (Uṭṭun 12 n yennayer 2964. (tiferrin : 87/88).

Soyez le premier à commenter

Laisser un commentaire