Laẓ

Laẓ yuɣ tasga s nnmara-s tafuhrit* deg tallit nni. Ctaqen medden ad ččen akken ad ṛwun. Maca ɣas iɛebbaḍ d ilmawen, iẓerman ttemceččawen, ulumaɛna imdanene xeddmen nnif*, skanayen-d udawen yeḍsan. Yal yiwen, ad as-tiniḍ yečča yeṛwa s tawant* yettbin-d amzun ur tufiḍ d acu i t-yuɣen.

D lqella n tgella yesḍulin* yal ass i yal amdan i yessuffuɣen taxelqit b Yillu ɣef lexlawi. Uɣalen yemdanen kessen am tɣeṭṭen. Kra n teḥcict yellan ɣur-s aman ẓiden am d tifaf*, aweḥrir* neɣ ẓidelmum*, ad ɣlin fell-as d aqlaɛ Ggaren-tt ar yimawen nsen werɛad turad, acku win yelluẓen ur yettmuqul (yeṭṭalay) ara ɣer tezdeg, yettnadi kan ad yaf s wacu ara yessdhu taɛebbuṭ-is yexwan.

Yiwen wergz yuɣal-d seg tkessawt, icenfiren-is meṛṛa d izegzawen. Iban yečča d tiqebbiḍin n tifaf d ẓidlmum, atg,…
Am lmal am yemdanen kessen ula d nutni armi gan yimawen-nsen ttuɣalen akken. Sseqsit imezwura yeddren zik di lḥif d lqella n temɛict*. Ayen ur tessin ara tasuta n tura. Ula d ismawen n teḥcicin qlilit igad i ten-ilemden, acku tudert tbeddel, imdanen ǧǧan kullec (01).

Amdan agi, yedda kra, yemmuger-d tagrawt n yemdukal-is teddun ar wansi i d-yekka. Ula d nutni yessuffeɣ-iten laẓ ɣef lexlawi. Mi d-wwḍen ar tama-s, yenna i yiman-is deg ul-ines : »tura ula d wigi teddun ad ṛwun taḍsa deg-sen akken i d-ṛwiɣ taɣeddiwt* ». Imiren yenna :

– Anida i tetteddum akka ?
– Amzun ur twalaḍ ara anida i yettawi webrid-a ma mačči ɣer tferkiwin n teddart-nneɣ, i as-yerra yiwen deg-sen.
– Nekk ẓriɣ anda yettawi webrid-a, d kunwi ur nwala ara i ixeddmen tameɣra ass-a, yesseččay tagella i d-yefka Yillu, yefreḥ nezzeh, acku yezweǧ-as i mmi-s amenzu.
Kra deg wayen akk i sen-yenna ur yelli d asnulfu i t-id-yesnulfa. Lɛibad imeɣban, imawen-nsen ččuren-d d imetman, ttuddumen-d izeddayen, ifassen ṭṭfen iɛebbaḍ, neṭṭqeb-d ɣef tikelt :

– Anwa ? Anwa i yesseččayen ?
– Dda Caɛban n Wulmu Ufella, i asen-yerra s taḍsa. Mazal ur d-ifukk ara awal, tarbaɛt n twaɣit tuzzel am tbuciṭant metwal axxam n tmeɣra, axxam n Dda Caɛban n at Wulmu, ɣer deffir ala aɣebbar i d-yeggran. Argaz yeqqim yelli deg warquqen-is*, ula d netta mazal-it yelluẓ. Yenn deg ul-is, yerna ula d netta deffir yimddukal-is i ikellex akken ad ččen seksu d weksum.

Amawal
tafuhrit : agressive
temɛict : tudert
awehrir : coquelicot
ẓidelmum : bot, herbe comestible des champs.
nnif : dignité
taɣeddiwt, tilitten : herbe très comestible.
Tasɣunt : revue

Lmaɛna n wawal :
01) Ula d ismawen n teḥcicin qlilit igad i ten-ilemden, acku tudert tbeddel, imdanen ǧǧan kullec. Tudert tveddel, ilmeẓyen ass-a ttun kra yellan d issem n tifaf, aweḥrir neɣ ẓidelmum, atg,…

* Tasɣunt s tmaziɣt n Usqamu Unnig n Tmuzɣa (aɣmis « tamaziɣt tura », tiferrett 89/90. Uttun : Un 12/yennayer 2014).

 

Soyez le premier à commenter

Laisser un commentaire

Votre adresse de messagerie ne sera pas publiée.


*