Tafsut I Tṛables

Taɛlamt Imaziγen teţṛefṛif deg igenni n Tṛables. Ţţeswiṛa s tezger tilisa, tnuda timura. Amaḍal akw iwala ţ. Ass enni, ayen ẓṛant wallen d ayen akkenni neţṛaǧu s tuffra. D ayen akken s ur numin ara. Adabu enni imeḥqen tamaziγt, i ţ yenfan ula deg yexxamen yeγli, yegrareb.

Wi s yennan a d yas wass enn ? Nerra tablaṭ i wul, amzun akken neqbel akw ayen i d iḍṛan, neqbel tarennawt n “Wedlis azegzaw” n Qeddafi, tarennawt n Ibaatiyen, wid enni imeḍlen tamaziγt, imḥan ism is, yeqelɛan aẓaṛ is. Aẓaṛ enni yeṛṣan deg umezruy n tmurt, aẓaṛ i d yekkan si zzman n Hérodote. Aẓaṛ enni d yefkan ula d isem agi Libya, isem n tmurt n-wassa. Yak, zik, wid umi qqaren “Ilibiyen” llan d-taqbilt tamaziγt deg Libya.

D-tideţ, asirem enni amezwaru i yeččuṛen ulawen, isluγ it wayen i t id iḍefṛen: tarennawt Imaziγen n Wedrar Nefussa, ɛallqen ţ i yemǧuhad n tineslemt, at ičumar yeţţawes Utaram !

Maca, xas akken, taɛlamt Imaziγen enni iṛefeṛfen deg tazwara nnig lγaṛ n Maɛmeṛ Qeddafi, akken mazal it yedduxxun, yuγal d ixerban, teǧǧa d lateṛ deg-wallaγen. Mazal ad texdem ccγwel is. Ulac tardast n wakal n Tferka Ugafa ara ţ yeţţun.

Mi nwala, ass enni n tlelli d yuγalen, ilmeẓyen ɛallan Yaz (Z) i γ icerken deg igenni n Tṛables, iban belli tarennawt enni diγen tcerk aγ akken i γ icrek Yaz enni izduklen nnil, awraγ d uzegzaw. Neţţat enneγ, nekwni nban ines.

Tarennawt agi tedda d deg lǧeṛṛa n Tefsut Imaziγen n 1980, i yekkren i tsertit n ukabar yiwen, deg lǧeṛṛa isuraf n wid akw innuγen akken a d sekflen tamagit yeţwarkḍen, a d sekflen iẓuṛan enni isḥerqen Ibaatiyen iḥeqqaṛen, deg lǧeṛṛa n wid akw innuγen γef izerfan ennsen. Ass a Tafsut imaziγen, akw Imaziγen n tmura ţţikin degs.

Daymi, tameγra yagi useggwas a n Tefust Imaziγen tis 32, nessaram a ţ nehdu i tiyessetmatin enneγ yakw d wamtaten enneγ imaziγen n Libya. Wid i d yeḥyan awal umedyaz amaziγ i s yennan, nnig 50 iseggwasen akkin:

Ṭzemṛeḍ ad teǧǧeḍ i laẓ tiɛebbaḍ
Tzemreḍ ad tsekweḍ ifadden
Tzemreḍ ad teṛẓeḍ ţnefexa n-wezṛu n tnicca γef ẓẓebṛa n tmuḥqranit
Yiwen ur izmir ad isγar iγbula n ddaw tmurt i d iţţaken insisen deg i id iţsummu ayefki n telelli ṛṛuḥ agujil.

Awalen agi, ma nerra ten γer tsertit, a d ibin belli idles amaziγ, d win i d ayefki n tlelli γef yewwi umedyaz. A d nesmekti belli deg lǧeṛṛa n Umussu amaziγ i d illul Ijerrid n Izerfan n Wemdan amezwaru deg tmurt n Lzzayer, d imeγnasen n tmaziγt i t id isekkren, i t irefden. Ama deg Lmeṛṛuk, ama deg Lzzayer, deg Libya neγ deg Tunes assa iḍehr ed belli, si tama n weγref, yiwen n sslak i tsalafit i yellan : d-timmuzeγt.

Ataram yuwsen akken ad γlin isnarafen n Waaraben, ass a iṛuḥ am wakken iqbel ccariɛa ad-tuγal deg-wemkan ennsen. Wannag atamten enneγ Imucaγ, kkren i ṭṭrad n taggara.

Tafsut agi i Tṛables, a ţ nefk i tiyessetmatin enneγ d watmaten enneγ imaziγen n Libya.

Tasfut agi i Tṛables, a ţ neg d tamuli n tegmaţ, n temselta tamaynut deg umennuγ i γ yeggunin, d tin ara d yawin limaṛat enniḍen, d tin ara yellin tibbura ywehhan γer tγaltin ansi ara d iḍil usirem.

Tafsut agi i Tṛables, d tiγri ara nger i tsuda tigraγelnawin, a nezwir seg l’OTAN, i yeţţikin deg useγli n Maammar Qeddafi, iwakken ur ţţaǧǧant ad yuγal g wemkan is udabu ara γ issendemmen. A d naf iman enneγ neqqar : ţţif zzman n Qeddafi, a nuγal degs neţmenni.

Neẓṛa ayen yecqan Ataram, ur yelli d aγref n Libya, ayen i t yecqan d lgaz. Fellas i ṭerṣa tiṭ is, awi d kan a d iţceṛcuṛ. Maca, mačči γer yiwen ssuq i nsewweq nekwni yides. Di ssuq enneγ, nekwni, aγref amaziγ yezwar lgaz. Deg tmurt enneγ, tamaziγt teţţalas tudert.

Meγres 2962

Soyez le premier à commenter

Laisser un commentaire

Votre adresse de messagerie ne sera pas publiée.


*