Tajmilt i Mmi-s n Uxeldun

Imura n umezruy nneɣ
Yeḍbaɛ* s ufus d amusnaw
Seg uẓar win seg-i id-iffeɣ
S iglezyam* wid t-igezmen
Hiruduṭ* ar Ibn Xaldun
Tiɣri n umaziɣ tedda

Irgazen deg umezruy bennun*
S lkuraj terna tmara
Teggra-d tura gar-aneɣ
Cfut ay arrac cfut
Alqaf d-iɣlin d ayla nneɣ
Γurwat ad teṛmel tatut
Dda Lmulud iqɛed-itt
Arraw-is gan-as leqṛar*
Zzman ass-a yessaɣ-itt*
Di temdinin d izuɣar
Cfut ay arrac cfut

D ccetwa i k-d-ifkan aman
Leqrar d laman
D adfel gersen ɣef wedrar
Tafsut teẓɣel-ak amkan
Tga-ak leḥsan
S yiṭij-ik i d a k-izwar
Tegmiḍ tcebbḥeḍ leǧnan

Amgud* n ṛṛemman
Itwennes yid-k yurar

Ay ajeǧǧig yennernan
Σeceq-k wid iɣran
Ẓran leqder-ik yufrar*
Fell-ak ifrax ay cnan
Awalen sefran*
Γas tira tadwatt* temmar
D ul-iw i k-id-imektan
S ussirem d leḥzan
Acḥal teffreḍ di lesrar*

Wagi i d amud n isefra yerran tajmilt i umusnaw Ibn Xaldun yuran amezruy nneɣ ak d wiyaḍ merra i d-yewwin tamusni akken amaḍal sumata ad yaẓ, ad yeddu ar zzat. Ihi, d imdanen am wigi ara nɛaned akken ula d nekkni a d-neffeɣ si tcerkett i deg nella acḥal uya. Imi amezruy nneɣ nestehza deg-s, tutlayt nneɣ diɣen nerra-tt ar ṭṭer armi ass-a neqqim deg tlemmast n ubrid. Nettmenni agdud nneɣ ad yendekwal u ad yeddu ar zzat am netta am wiyaḍ.

Zik, deg iseggasen nni n leḥrs d lbaṭel id-yesseɣli uḍabu n tegrawt n Ujda, xilla deg-neɣ neɣra kan Charles André Julien, Eugen Guernier, Stefan Gssel, atg. Ur neẓra ara belli Mmi-s Uxeldun yura qus n idlisen af umezruy nneɣ. Ihi, s wayagi izukar d uḍabu ur zmiren ara ad-neṭqen, ad qejjmen akken ak-ini belli « d irumyen i yura ayagi akken ad ferqen agdud azayri ». Acku di tallit n Bumedyen akk-a aɣ-d-qqaren izukar n Lzayer akken aɣ-sfeclen, aɣ-erẓen. 4 idlisen agi i yura Mmi-s n Uxeldun ala ayen yelhan id-inna af Imaziɣen sumat. Tanmirt-is ihi !

Lemɛani n ddunit
Tura yewweḍ-d lawan akken ad tsemmim meṛṛa i tarwa nnewen s yismawen nneɣ n imaziɣen. Ifuk tura wasmi akken imdanen gnen am ulli ! Ur d-ttmeslayeɣ ara af widak i yenzan « am akaren deg ssuq ». Ttemmeslayeɣ-d af kunwi i yeqqaren, yettwalin aẓeṭṭa , yekcem lḥir d weɣbel af tagara nneɣ sumata. Acku, ur tettut ara , maca ma tegnem acengu aɛrav -ineslem netta yelha-d yid-neɣ akken aɣ-yerr d netta.

Acimi? Acku akka is-yeshel ! A nuɣal d netta yernu tamurt ad tt-yerr d ayla-s. Ihi, tura beddet af yiman nnwen : tutlayt nneɣ, ttagi kan i si ara tessawalem anida tellam, zzat n win yebɣu yili, ma ɛadik ma gar ignawiyen.
Ad-iniɣ awal af imerkantiyen i yessexdamen amma di lɣerva neɣ di tmurt : Ur sen-ssawalet ara s tzikert nnsen ! Mi tebbucim axeddam zwiret seg widak yettmeslayen tutlayt nneɣ. D wigi i yzewwer lḥal akken a sen-tefkem aɣrum.

Muqlet kan: Aqvayli ma ur issin ara taɛravt werǧin at-yebbuci iziker deg umekkan. Nutni ma ur tessineḍ ara tagnawit nnsen, ula d abrid ulac win ara k-t-iɛeggenen. Ihi akwit ula d kunwi u muqlet amek i selken iman nnsen Ibaskiwen d Ikatalinen n Spaniya. Atg ula d Iflamaniyen ula d nutni sɛaddan lḥerss af tutlat nnsen.
Tanmirt nwen sumata ! Retour ligne automatique
* Isefra yagi d wid n gmatneɣ Mas Yehya Yanes i yellan deg udils ines iwumi isemma : « tumucuha n tmennadt Iqvayliyen deg tferrett 14 d 15.

Amawal:

yeḍbaɛ: frappélegaliser
iglezyam: pioches
Hiruduṭ: Herodote, savant grec
Ibn Khaldoun: Mmmi-s n Uxeldun
bennun: batissent
leqṛar: avenir
yessaɣ: semer, qui pousse
teẓɣel: chauffée.
tadwatt: encrier
amgud: jeune verger. Qui commence à de donner des fruits.
yufrar: au dessus de…à la surface
sefran: en poésie
lesrar: les honneurs
qus: quatre
aẓeṭṭa:  la toile, le net.

Soyez le premier à commenter

Laisser un commentaire

Votre adresse de messagerie ne sera pas publiée.


*