Tamurt tɣurr-it, tayri terna-as (II)

Ata yessaweḍ-d Meqran s axxam, wwten-tt-id d tazzla deg qrad* neɣ quz* yid-sen, i wakken ad menɛen seg ugeffur i d-iɣellin s uzayeḍ*. Ileḥq-d, ɣas akken llexsen merra iceṭṭiḍen-nsen. Ddukklen-d akken d agraw*, maca yiwen deg-sen mačči iksev* ssiwan*.
– Iḍ ameggaz, i yenna Meqran i wervaɛ-nni.
– Akka ihi a Meqra, di laman, i-yas yerra yiwen deg-sen.

Mi d-yekcem, iruḥ yeffi-d afenǧal n uyefki n tfunast ad t-isew, xerṣum* ad d-yerr nnehta* n ɛeyyu i t-id-ikeflen*. Yewwi-t yid-s, yuli ɣer texxamt. Yekkes abalṭun-is* iɛelleq-it ɣef ukersi, ma d isebbaḍen-is i ɛummen seg waman yessufeɣ iten-id ar berra. Yessaɣ tiliẓri* yessaked kra deg isallen, dɣa yemmekta-d, yeddem-d ungal-nni n Lmulud Ferɛun “mmi-s n igellil”, waqila ileḥq-d ar usevdar* 60, yeddem-d at-yelli, ahan yeṣṣuna usawal.

Mi yerfed yufa d ameddakel-is Muḥ, mmi-s n taddart n Cabḥa*, tameddakelt-is. Γef waya yakan i t-yessen, d netta i t-iɛawnen armi i teqvel, yerna d mmi-s n twacult, iḥemmel kan taḍsa, d imnecreḥ*, ur iṛewwu ara taḍsa, yeččur d tiqsiḍin*. Ma d Cabḥa d yiwet n tlemẓit yeqqaren deg testdawit*. Tafekka-s* d taburqaqt*, d taɛlayant am acemma deg lqedd. Acebbub-is d aberkan am win n ukval* ; ma d allen-is d tiqahwiyin*, deg teglimt d tacebḥant.

Tegrurez* yerna tecbeḥ, d isem-is i d awal-is*, ɣef waya i terwi laɛqel n Meqran. D nettat kan i yzedɣen allaɣ-is d wul-is seg asmi i tt-yessen. D nettat kan i d cceɣl-is, i d aɣbel-is, tewwi-as amur ameqran deg wakud-is*. Yezgga yettxemmim ar ɣer-s. Mi yerfed Meqran tilifun, yenna-as-d Muḥ :
– Azul fell-ak a Meqran

– Azul a Muḥ, amek telliḍ, tgerrzeḍ kra ?
– Ad fell-ak isall lxir, maɛna mačči fell-i i ɣef bɣiɣ ad ak-id-mmeslayeɣ.
– Γef anwa ihi ?….Ah dayen mmektaɣ-d, ɣef Cabḥa i ccedhaɣ acḥal aya. Aɛni tweṣṣa-k-id ɣef kra ?
– Mdah*, mačči d lewṣaya, ayen ara k-d-iniɣ yugar lewṣaya. Ur ẓriɣ ara ansi ara d-bduɣ, maca ilaq ad ak-d-iniɣ.
– Aha nṭeq. Yak ulac d acu i tt-yuɣen ?
– Tidett kan a Meqran, yella wayen i tt-yuɣen. Zgelli* mi d-tuɣal seg tesdawit n Vgayet, uqbel ad d-yaweḍ ufurgut i deg tedda ɣer teɣremt* n Uqbu, yecceg deg yiwet n tkessart*, yuɣal-d seg ugafa*.

Amawal
qrad : 3 en berbère
quz : 4 en berbère
ikseb : posséder
uzayeḍ : tempête
ssiwan : parapluie
agraw : groupe
nnehta : soupir, souffle
xerṣum : au moins
ikeflen : submergé par…
abalṭun : manteau. Certain disent abbaltu et d’autres enfin : amantu
asevdar : page
Cabḥa : prénom de fille
imnecreḥ : joyeux, rigolo
iṛewwu : satisfaire, combler de,…rassasier
tiqsiḍin : anecdotes, histoires rigolotes
tesdawit : université
taburqaqt : mince
tiqahwiyin : yeux noisettes
tegrurez : élégante, bien dessinée
ukval : cheveux de maïs
ugafa : talus
wakud : temps
tafekka : corps
zgelli : tout à l’heure.
teɣremt : ville
tamelḥant : séduisante,
yexsimen : adversaires, opposants,
mdah : non. le terme “lla” ou ala est arabe.

Lemɛani n ddunit
“d isem-is i d awal-is” : qqaren-t medden mara yili snat n tɣawsiwin mṣsavant, dduklent deg kullec. Dagi amedya yedda f ṣṣifa n Cavḥa tucviḥt. Af anect-agi i tt-id-icekker bab n tullis agi.

*Wagi taḥric wis-sin n tullis i d-yura Mas Xaled Acwi deg umis n useqqamu unnig n Timmuzɣa (HCA) Uṭun wis 12 yenner 2964.
*(kra n imeslayen deg uḍris agi, beddleɣ-ten, acku gan s taɛrabt).

 

Soyez le premier à commenter

Laisser un commentaire